NUPek eta NILSAk beste lau urtez berritu dute Tokiko Jasangarritasunari buruzko Katedra

Ramón Gonzalo Nafarroako Unibertsitate Publikoko (NUPeko) errektoreak eta Óscar Chivite Nafarroako Gobernuko Lurralde Kohesioko kontseilari eta NILSAko Administrazio Kontseiluko presidenteak berritu egin dute 2021ean unibertsitate baten eta foru-sozietate publiko baten arteko lehen ikerketa-katedra eratu zuen hitzarmena. 

Tokiko Jasangarritasunari buruzko NILSA Katedra izenarekin, ezagutza trukatzeko kasu arrakastatsu gisa bilakatu da denbora honetan, eta sozietate publiko baten eguneroko lanean azterketa zientifiko-teorikoak zehaztea ekarri du.

NILSA Nafarroako saneamenduaren eta arazketaren arduraduna da, eta azken urteotan buru-belarri aritu da I+G+b-a sustatzen, hain zuzen ere NUPekin eta beste unibertsitate eta ikerketa-zentro batzuekin (Zaragozako Unibertsitatearekin, Bartzelonako Unibertsitatearekin, CEITekin, CENERekin...) lankidetzan aritu ondoren. Helburu nagusi izan du zaintza teknologikoa eta ikerketa aplikatua garatzea, hondakin-ura eta haren deribatuak (lohiak, esaterako) garbitzeko prozesuak etengabe hobetzeko eta Nafarroako lurralde osoan tokiko jasangarritasunerako neurri berriak ezartzeko, hala nola hiri-drainatzea.  

Katedra (urteko 30.000 euroko aurrekontua izaten jarraituko du) unibertsitateko ikasleei eta enpresa-sektoreko profesionalei prestakuntza praktikoa ematen laguntzeaz ere arduratzen da. Bere ibilbidean zehar, gradu amaierako bi lanen, master amaierako bi lanen eta bost hilabeteko praktiken esparru izan da hamabi ikaslerentzat.  

Denbora horretan, halaber, sei jardunaldi publiko eta doako antolatu ditu, ardatz hartuta araztegiko lohien kudeaketa, uraren ziklo integralaren digitalizazioa, energia- eta ingurumen-erronkak eta hiri-drainatze jasangarria. Bestalde, eta esparru horretan ere, NILSAren I+G+b sailak Katedraren proiektuei buruzko podcast-programa bat abiarazi zuen, baita irismen handiagoko beste batzuk ere, hiru hilean behingoak eta elebidunak (gaztelania-euskara), nilsa.com webgunean kontsulta daitezkeenak eta sare sozialetan argitaratzen direnak publiko jeneralistaren barruan dibulgazioa sustatzeko. Katedrak kanal propioa ireki zuen Youtuben (@catedrasostenibilidadlocal4543), antolatzen dituen jardunaldiak online eta modu irekian eskaintzeko eta ondoren modu publikoan kontsultatu daitezen biltegiratzeko. 

Datozen hogeita hamar egunetan batzorde misto bat eratuko da, bi eta bost ordezkari artekoa, haren presidentea eta idazkaria aukeratuko dituena, eta urtean bitan bilduko dena gutxienez, Katedraren jarduera gainbegiratzeko eta planifikatzeko. Hitzarmen honek bi urteko indarraldia du, eta urteko luzapen automatikoak izango ditu, gehienez ere lau urteko iraupenarekin. Kudeaketa ekonomikoa NUPeko Ikerketa Zerbitzuaren bidez egingo da. 

Katedra abiaraztea ekimen berritzailea izan zen Foru Administrazioaren esparruan unibertsitateko ezagutza eta talentu gaztea praktikan aprobetxatzeko, eta lau urte hauek erakutsi dute sozietate publikoek lizentziatu berrientzako pasabide gisa jardun dezaketela lan-merkaturantz, Katedra honetan parte hartu eta NILSAn lan egin duten lau ikasleren kasuek erakusten dutenez. Izan ere, Katedrak haiek gerora laneratzea erraztu du.