Iruñean, 2018ko azaroaren 8an
Allingo udalerriari dagozkio Arbeitza eta Zubielki, Jurramendiko Mankomunitatearen esparruan, 185 eta 104 biztanle erroldaturekin, hurrenez hurren, eta 2020an hasiko dira bertako hondakin-urak arazten. Orain arte, Arbeitzak, Ega ibaiaren eskuinaldean, bi isurketa-puntu zituen, tratamendurik gabeak. Zubielkik, aldiz, Ega ibaiaren ezkerraldean, isurketa-puntu bakarra zuen, tratamendurik gabea. Instalazio berria eraikita, hiru puntuak kendu, eta egoera bikainean itzuliko da ibaira ur-emari osoa.
Proiektua egiteko orduan, uholdegarritasuna izan da baldintzatzaile nagusia. Izan ere, lehentasunezko fluxu-eremuaren barruan dago bi herriguneen arteko lautada uholde-gertakarietan. Horregatik, eremu horretatik kanpo kokatu beharra zegoen, errepide eta herriguneetatik urrun, gainera, jarduketaren inpaktua ahalik eta gehiena murrizte aldera biztanleen artean. Azkenean, eskuinaldean kokatutako landa-finka bat aukeratu da, baldintzatzaile guztiak hobekien asetzen dituelakoan.
Hantxe eraikiko da araztegia, beraz, eta Arbeitzako isurketak bateratzen dituen grabitate-hustubide baten bidez iritsiko dira haraino hondakin-urak. Zubielkiko isurketa ere hustubide horretatik iritsiko da araztegiraino; sifoi baten bidez bideratuko da isurketa hustubidera. Sakonera handian dago hustubidea araztegira iristen denean, eta, horregatik, ponpaketa-sistema erabiliko da desnibela gainditu eta hondakin-urak araztegira sartu ahal izateko. Arbeitzatik, 462,10 metro luze izango da hustubidea, eta Zubielkitik, 221,95 metro.
Proiektatutako instalazioak 0,98 litroko ur-emaria tratatuko du segundoko, batez beste, eta, gehienez, 6,87 litrokoa hartuko du segundoko (hortik gora, funtzionamendua eten egingo da). Edonola ere, ez da espero puntako ur-emariak (ekaitza gogor batean, adibidez) 2,36 litrotik gorakoak izatea segundoko. Horrez gain, karga kutsatzaile honetarako diseinatu da: 29 kilo DBO5 eguneko.
Instalazioak iragazki biologikodun arazte-sistema izango du, ohikoena NILSAn eta zabalduena Nafarroan; lehen dekantazioa, azken dekantazioa eta kontrol-urmaela hartuko ditu prozesuak. Urmaela 14 x 8 metro luze-zabal izango da, eta bi metro sakon, hots, 224 metro kubikoko edukiera izango du.
2019an hasiko da eraikitzen obra, eta gauzatzeko epea hamar hilabetekoa da. Aurrekontuak 872.710,70 € jo du, eta saneamendu-kanonaren bidez finantzatuko da osorik. Zerga bat da hori, NILSAk kudeatzen duena, eta zergapeko guztiek uraren ordainagiriaren bidez ordaintzen dute.